الكلمـــــة الحـــــرّة

الكلمـــــة الحـــــرّة

منتدى ثقافي عام
 
الرئيسيةالتسجيلدخول
شاطر | 
 

 بساتين الورد شعر شعبي عراقي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
عاشق السلام
مشرف على المنتدى الأدبي


عدد المساهمات: 135
نقاط: 5686
تاريخ التسجيل: 14/11/2009
العمر: 45
الموقع: ملتقى عراق السلام الثقافي

مُساهمةموضوع: بساتين الورد شعر شعبي عراقي   الإثنين مارس 01, 2010 9:36 pm

[size=18] شاعر شعبي عراقي جمعه الحلفي





بساتين الورد



    من يا نبع مرتوي؟

    من يا غصن تفاح جْبتْ ألوان لخدودك

    من يامجره نزلت

    من ياسما ويا گَاع لميت الْهوُه لْعودك

    وك أنا مجبور..

    أنا مجبور بعيونك

    خليني لْبساتين الورد ناطور

    مَحّدْ يوصل حدودك.

    1989
الى الاعلى





غصن التين



    يا مايْ ليوصلنّي لْبساتينك؟

    يا نسمة؟

    يا نهر الْيدلّيني يغصن تينك؟

    وك تِعَبْتْ وتعبتني وياك

    وديت العمر.. كل العمر خطار

    بلچن ترحم سنينك

    تداويني؟

    شتداويني وانا مبضّع على طولي بسچاچينك

    حسافة على الزمان الفات وياك

    وحسافة عليك، فرّطت العشگ ع الرايح وع الجاي

    بس وياي ما عدلت ميازينك

    روح بلا عتب ما تسوه حتى عتاب

    إلي ديني وألك دينك.

    دمشق 1989

الى الاعلى




نوم الحمام



    مثل نوم الحمام ينام

    يسكر بأول الكاسات

    ويتثاوب غنج من أول الگرصات

    وآنه...

    آنه اصبر صبر هايم

    ياشباچ روحي..

    يا هواها وليلها وقنديلهه الدايم

    چانه شظل إلي من النوم

    وانتَه النوم كله وياك نايم؟

    دمشق 1991

الى الاعلى



برد



    چنت أدورلك بروحي على گمره

    تفيي لسنينك وتنثرلك سعد

    چنت أدورلك على غيمه زغيره

    تطش على أيامك ورد

    چنت اسامح واشتكيلك

    يلي غارگ بالدفو

    وك روحي مليانه برد!

    دمشق 1991

الى الاعلى




نوم الظهاري



    ماجو على موعدي

    گالوا خذانه النوم

    وآنه من مية سنة

    أنطر لذاك اليوم

    خلصّت كاس الهنا

    وصبيت كاس هموم

    يا نوم شلّك علي..

    اللي يريدك تهجره

    والمايريدك زايره كل يوم!

    دمشق 1989

الى الاعلى




أمير الحمام



    مرات يچذب علي

    بعيونه يبان الچذب

    من يستحي تحمر خدوده خجل

    ومن يبتسم بالروح... يلعب لعب

    وآنه أظل متلّوه بحيرتي

    الله البلاني بيه

    چا ياهو اليفك بلوتي؟

    دمشق 1990

الى الاعلى




خميلة عيد



    سبحان الفرح بشفافك ألوان

    من تضحك تصير الدنيا بستان

    وسبحان النسيم اللي يمر بيك

    يسلّم ع الرّمش والرّمش نعسان

    وسبحان الحلاوة التحت العيون

    وسبحان الضوه الخجلان والغيران

    سبحانك خميلة عيد ومراجيح

    وسبحان الثمر ع الصدر ريان

    سبحانك يحلو الطول يمگمّر

    سبحانك... وألف... سبحان

    دمشق 1989

الى الاعلى




وين أنته؟



    أدور عليك

    ما خليت جوري ما نشدته عليك

    أدور عليك..

    من أول صبا لليوم

    رحتلك للشتا وللصيف

    ورحتلك للصحو وللطيف

    أدور عليك بين الياس والريحان

    أدور عليك بين المشمش الريان

    أدور عليك بين التين والقداح

    ساءلت البريسم والطلع والخوخ والرمان

    وحلفّت الهوه والنوم والتفاح

    وناشدت الغطا النعسان

    أدور عليك.. وين أنته؟

    آنه من التعب تعبان!

    دمشق 1989

الى الاعلى




آخر كاس



    چذّبت روحي وصدگتك أنته

    من گلتلي: يمكن تخضّر بگايا الروح ياس

    وعلى هالچذبه...

    شربت وياك آخر كاس!



مدري!



    ناطرتك..

    مثل ما تنطّر الورده نداها

    وانته موگطرة نده وبس

    أنته نهر الروح، تسگي الروح وتخفف ظماها

    ناطرتك..

    مثل ما تنطر الگاع المطر

    روحي صبخه وانته غيمة شوگ

    تتباهى بنسايمها وهواها

    أنته من ياكون اجيت

    يامجرّة مضيع سنيني بسماها

    انته عفت الناس كلها وتلوهتني

    منين اجيب سنين لشواگك،

    وانا عمري تعداها وجزاها

    انته... جمرة شوگ بيدي

    مدري اذبها.. مدري اچوي سنيني بيها

    مدري اخلي العمر يتباهى بضواها

    يانبي موديك گلي؟

    تگطع صيامي وانا الحالف قسم،

    مابدّل الجنة بسواها

    ضوگتني...

    ضوگتني طعم البساتين من تفاحة آدم

    وانته تفاح البساتين وغواها

    من طراوة طولك تطول الأيام

    ومن حلاوة عشرتك يگصر مداها

    انته من تهل طواري العيد هلت،

    يا فرحها ويا طربها ويا غناها

    انته شجرة ياسمين،

    اشجاله شمام البراري يغار من نسمة هواها؟

    انته...

    انته يا مجنون دلاك عله دربي؟

    يا نبي مسودن رسملك سجتي؟

    يانهر جابك على العشبه وسگاها،

    وك روحي صبارة حزن يبن الأوادم

    وانته گطرة فرح..

    شيساگي العمر لو عطشت سنينه لصباها

    بس اگلك:

    انته مو گطرة فرح،

    انته كل الفرح

    كل الحزن

    كل الورد

    كل نجوم عمري وكل سماها.

    دمشق 1988

الى الاعلى






مرجان



    سبگني لحسنك الرمان... وتفرّط...

    مثل حبات ليلو عله النهد

    والگاع ما وسعت غنج...

    مرجان يتغاوى بوسط مرجان

    حبه هنا... وحبه هناك

    بوسات ونوايح والروايح للسما

    حنه وسعد مديوف هالنعسان

    ساكت... وانا حاير

    والغطا منده..

    وشته مصيف گبل نيسان

    آنه ما شايف شته بنصّ الشته وعرگان؟

    معذور العمر لو ذاب...

    لو ضاع بحلاة النوم والنسيان

    ماهوه العمر... كل العمر... بمُية الفنجان غرگان!

    ساكت وآنه حاير.. ليش زعلان النهد؟..

    والروح تصرخ... ليش عالي الشان زعلان؟

    داويني...

    داويني يصاحب جمبده وساهون فوگ الصرّه

    وطيورك زغيره ترف بلا جنحان

    داويني...

    داويني العشگ هدني

    وحلاتك ساحنه الروح

    وطراوة شفتك ما ترحم التلفان

    وك داويني يدافي من الثلج ومحير النهران

    داويني...

    أصيح من الجمر والجمر گبلي يصيح بردان!

    دمشق 1992

الى الاعلى




حالة عامة



    لبس حزنه.. وتيمم بالشهاده وفارگ البيت

    تتبعه أمه بصلاة لعتبة الباب

    تلفّت بالدرب وتحاشى العيون

    ولم بعضه على بعضه وغاب

    يبني...

    يبني عله المحن صبر اليحبون

    يگاوون الجرح عن لا يزلون.

    نزع حزنه.. وتيمم بالمحبة وفارگ الروح

    وتذكر طيبة أمه وأهله والناس

    وزهى بطبعه وصداقاته وصبر زاد

    وقره تاريخ همه يشيب الراس

    وقره حزنه على كل حيطان بغداد

    يبني..

    يبني الناس بيها الزين والشين

    بيهم يشتري بدمه الصداقات

    وبيهم يشتري بدمك نياشين.



    نزع گلبه.. وتيمم بالصداقة وشرع العين

    وابحر بالحلم يتمرى الأيام

    ولگه بحلمه محبة الناس سچين

    الوفي تحده وتگص البلوفه يلين

    ولگه بحلمه الوطن لو عزت العين

    تمطر له السما ويخضر بساتين

    وتخضر له الخلايا بطارف الچف

    وتطگ دجله وترويله الشرايين

    يبني..

    يبني الما يشد الناس ع الحيل

    يگل ثگله ويخف بأول السيل!

    بغداد 1979

الى الاعلى




حاير



    حاير...

    دايره الدنيا

    وانه ويَّ الدنيا داير

    مبحر.. ومدري لوين يريد بيه الموج

    دوختني الدواير..

    شايل شراعي مثل راية حزن

    مركب بنص بحر ضايع

    شايل شراعي وشواطيك بعيده

    ولاني رايح لاني راجع

    ضيعتني.. وضاعت سنيني غُلب

    ولانه گادر اشتريك ولانه بايع!

    ذابله أيامي مثل نخله وحيده على الشرايع

    واگف بآخر سنين العمر

    ناطر لاچن ماني ناطر

    ليلي طال وحزني يتناسل حزن

    أبچي... تنزل دموعي خناجر

    ومن كثر حزني غدت روحي مگابر.

    دمشق 1992



الى الاعلى


مليت



    راوست الثگل مرات

    وعدلت الثگل مرات

    داريت الحزن مرات

    وخاويت الجرح مرات

    باريت الزعل مرات

    وجاريت الچذب مرات

    وساهرت الليالي البيض وتعديت

    وعديت الليالي السود وتعديت

    لچن مليت...مليت



    عاونتك على الكلفات مرات

    وضگت كاسات من فرگاك مرات

    وعفت لجلك هلي مرات.. مرات

    وشفت منك مصايب ماسدن يا... طيب الذات

    وعلى دربك رحت للموت ومن الموت رديت

    ولجل عينك أنذال الناس باريت

    لچن مليت... مليت



    من ثگل الدمع بالعين.. مليت

    ومن ثگل الحزن بالروح.. مليت

    ومن ثگل الذنب بالراس.. مليت

    أيام عديت الك

    وسنين عديت الك

    وزلات عديت الك

    وحطيتك ابروحي

    يمزيد جروحي

    يا... شمعة البيت

    مليت... مليت



    وديني لهلي ياطيف

    وصلني لهلي ياطيف

    گربني لهلي ياطيف

    هلي...

    ياهلي... ياضيفي العزيزالماوراه ضيف

    يا نسمه عليله بأول الصيف

    يا ليلي الحزين الفارگ الكيف

    يا لحظة حياة بطارف السيف

    هلي..

    ياهلي.. هلُو يالبعيدين

    يا ناسينّا

    وچنكم ولا ناسين

    يمتانينّا ولا چنكم متانين

    ياطعم العشگ ياريحة الطين

    يا نفحة وطن محروگ يا بيت

    أنا مليت...

    مليت..

    مليت..

    مليت

    دمشق 1986

الى الاعلى




عبود



    طويله أيامنا.. كلّش طويله

    وحزينه أيامنا.. كلّش حزينه

    غبره أيامنا المرّت يعبود

    وغبره أيامنا اللتمر يعبود

    ومدري شضاملك دهرك يعبود؟

    من ربك خلق آدم..

    خلق بغداد عالصوبين

    نخيل يطاول نجوم السما

    ونجمات من تنزل تكحل العين

    ونهر مغرور..

    چانت دجله مثل العيد

    تجري بوسط لبساتين

    ومن فوگ الجسر...

    چانت تشوف الناس كل بغداد:

    ضويات ومناير، والهوه عذيبي وعرس،

    عرس مجنون.

    وأحنه...

    أحنه هـ... ن..ا..ك

    خلف السده مطمورين

    كومه من الصرايف والبشر والطين

    مهمومين چنه من العطش والجوع

    بشر... لچن بشر من غير نوع

    ما شفنه الطفولة بعينه، مرت..

    مثل كسرة ثلج وتموع!

    چنه زغار...

    چنه زغار ياعبود

    چنه زغار.. نفرح من يجي العيد

    لچن يا عيد مر وما نزفنه دموع؟

    مسموح الفرح.. مسموح يا عبود

    مسموح الفرح بالغنى

    لچن بالفقر ممنوع

    چنه زغار...

    چنه زغار يا عبود

    چنه زغار حفاي بدرابين الصرايف دايرين

    حفاي بدرابين الزمن...

    حفاي منسيين

    نسأل عاليجي والراح

    نتحسر على الخبزه

    ونسمع سمع بالتفاح!

    وك چنه زغار ياعبود... چنه زغار

    وهـ...ن...ا...ك بكواليس الحكومة

    تبيع بينه وتشتري التجار

    بدو ويهود وإقطاع وضواري من دول كبرى

    تنهب واحنه منهوبين

    وك تجار چانت تحكم الأوطان

    وكلشي مسعّر ومختوم:

    الضماير والعقول، الدين والتاريخ،

    البشر والشعر والأحزان.

    كلشي مسعّر ومختوم

    وچان ارخص سعّر بالقايمه... الإنسان!

    وك كلشي مسعّر ومختوم يا عبود

    توكف بالمزاد وتشتري شتريد:

    نقابات وبرامج وانتخابات،

    عمال وفلح وأحزاب ثورية..

    من آخر طراز وكل الألوان

    كلشي مسعّر ومختوم

    وكلشي تشتري لوردت...

    مثل ما تشتري الدخان!

    وغفله...

    غفله من الحچي

    وغفله من البچي

    وغفله من القهر والجوع والحرمان

    كبرنا وكبرت الأيام

    ورجع بينه الزمان أردود يا عبود

    رجع بينه الزمان لأول الميعاد

    ومثل ما زاد فقرك... حزنك ازداد

    صحيح أتغيرت بغداد..

    لچن متغير الحكام

    ومثل ما راح نوري جالها صدام

    ولك عـ..بـ..و..د.. يا عبود

    بسّك لوم.. محد يشتري منك عذابات

    وك أنا شبيدي على سنين الگظت خطوة بمسافات

    وك بسّك لوم يا عبود

    أنا شبيدي على الباعو شعبهم بالمزادات

    وك عليناه وعليناه وصعدناه على آخر سماوات

    على چتوف البشر..

    عَ النجم.. عَ الهامات

    چان يغافل التاريخ ينزل ع الكراسي والوزارات

    وك أنا شبيدي على ثوار يتسمون

    لچنهم خدم عد الحكومات!

    كبرنا وكبرت الأيام يا عبود

    ورد بينه الزمان أردود

    وك كبرنا وكبرت الأيام

    وكبر بينه العراق الضاع بين أحلام وأوهام

    وهذاك انته:

    وحدك تحسب الأيام

    تعد سنينك وترجع تعد وتغلط وترجع...

    تعد الليل والساعات...

    تعد شگد حجيت

    شگد بچيت

    شگد ضاعت عليك أحلام

    وحدك تحسب الأيام..

    تمر جدام عينك تركض الأيام

    تعبرك... تركض ... الأيام

    تبعد .. وانته.. ذ..ا..ك انته

    حزين ومنزوي ومحتام..

    وحدك تحسب الأيام..

    وحدك ترسم سنينك على الريح

    ويذريها الغبار أوهام بأوهام

    وحدك تحسب الأيام

    و..حـ..د..ك تحسب الأيام يا عبود

    ويرد بيك الزمان أردود

    ولك عـ..بـ..و..د يا عبود

    أنا سايم الله عليك..

    اشيّم بيك كل شيمة هلك

    اشيّم بيك تاريخ القهر والظيم والحرمان

    اشيّم بيك أعز ما يملك الإنسان

    اذكرك بالطفوله وبالصبا التعبان

    اذكرك بمك الماتت هـ...نـ..ا..ك

    وانته هـ..نـ..ا..ك مدفون بصدى النسيان

    وك هم تذكر نواعيها؟

    هم تذكر بچيها عليك يا عبود..

    هم تذكر دللول؟..

    أذكرك لو چنت نسيان:



    دللول يالولد يبني دللول

    عدوك عليل وساكن الچول

    يمه.. يمه

    يمه.. راسي وجعني گومي شديه

    ترى شد الغريبه ما يمض بيه

    يبني.. يبني..

    يبني ديار الغريبه ما تلفّيك

    وبرد السفر يازين ياذيك

    وك ميّل..

    ميّل عله أهلك يبني عبود

    ترى هيهات غير أمك تباريك



    اشيّم بيك تاريخ القهر والظيم والحرمان

    اشيّم بيك... لا تنسى..

    لا تنسى هلك ما تنسي الأوطان

    وك وين تروح؟

    يا دنيا التلم حزنك

    وياحلم اليريح راسك التعبان؟

    ولك عبود تهت وتيهتنه وياك

    تهنا بيك وبلياك

    وك ثگل دين العراق عليك

    وثگل لجلك عليه الدين

    تانيناك..... تانيناك

    املنّا الصبر بيك

    وصبّرنا الدمع بالعين

    تانيناك.. مثل نجم الثريا نعاين لملگاك

    وك وين انته؟

    انته بيا سما بيا گاع

    انته بيا مجره نريد نتعنّاك

    نريد نتعنّاك!

    دمشق 1988

الى الاعلى






[/size]
الرجوع الى أعلى الصفحة اذهب الى الأسفل
http://iqalsalam.online-talk.net/
fadia
عضو ذهبي


عدد المساهمات: 792
نقاط: 6657
تاريخ التسجيل: 12/11/2009
الموقع: اغادير/المغرب

مُساهمةموضوع: رد: بساتين الورد شعر شعبي عراقي   الثلاثاء مارس 09, 2010 10:06 am

كلام جميل اخي عاشق السلام
تقبل تحياتي
الرجوع الى أعلى الصفحة اذهب الى الأسفل
جنة أماني
عضو


عدد المساهمات: 33
نقاط: 5128
تاريخ التسجيل: 07/03/2010
الموقع: http://www.facebook.com/group.php?gid=112117167959

مُساهمةموضوع: رد: بساتين الورد شعر شعبي عراقي   الخميس مارس 11, 2010 7:07 pm

شعلة حب
قلب العاشق ملتهب ،ملتهب بما نسميه حب ،شعلة حب
ماذا بعد شعلة حب ؟حريق غرام ؟أم نهاية في قبور الأحلام ؟قلب العاشق منصهر في نيران شعلة الحب إنصهار الشوق والعذاب ...
ماذا بعد هذا الإنصار ..
شوق متأجج أم لوعة فراق حارة ..
قلب الصب متورم من لمسات اللقاء ...
أم من عبقان شعلة الحب ،للحزن وجود في ذاك القلب ،غياب الحبيب ،فراق الحبيب
أم ماذا...
لن تنطفئ شعلة مانسميه حب ،سيعود الحبيب ستشتعل نيران الشوق ...
مصير لذيذ تطوقه ألسنة اللهب،مصير جميل فيه تذوق لطعم ما نسميه حب
اللسان يصدر أشعارا والحبر ينساب على الورق ٠٠رسائل ومواعيد ...
لكن قلب العاشق ملتهب ،أهل العشق تعساء ٠٠٠وأهل الشوق بؤساء لكنهم يوقدون دائما شعلة ما نسميه حب٠

الشاعرة التونسية جنة أماني
07٠08٠2001
الرجوع الى أعلى الصفحة اذهب الى الأسفل
http://www.facebook.com/pages/Janna-Amani/179388762740?v=wall&am
عاشق السلام
مشرف على المنتدى الأدبي


عدد المساهمات: 135
نقاط: 5686
تاريخ التسجيل: 14/11/2009
العمر: 45
الموقع: ملتقى عراق السلام الثقافي

مُساهمةموضوع: رد: بساتين الورد شعر شعبي عراقي   الثلاثاء مارس 16, 2010 5:43 pm

شكرا لكي يااختي فاديه لمروركي على الموضوع وان دلكلامك عن شيء فانما يدل على احساسك المرهف والذي يميز الجمال وشكرا جزيلا لاختنا الشاعره التونسيه جنة اماني على هذا التعبير الذي اعجز ان ارد عليه فهي شاعره ومعبره فكلامها شعر وذوق واحساس ومليء بالمشاعر واقول لها ان طعم العشق هو حين يكون اللقاء بين الحبيبين وان لاطعم للحياة ولا قيمه بلا حب مااسعد العاشق حينما يلتقي مع حبيبه ومااسعده حين يلقي بالعتاب وما اصعب الهجر والفراق ومااسعد المشتاق بعد اللقاء ومااصعب الخيانه التي تقتل الحبيب شكرا لكم اخواتي العزيزات فاديه وجنة اماني ولكن مني الف تحيه
الرجوع الى أعلى الصفحة اذهب الى الأسفل
http://iqalsalam.online-talk.net/
 

بساتين الورد شعر شعبي عراقي

استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
الكلمـــــة الحـــــرّة :: -