خلال فضّة
أمّي..أمّ الخلال الفضّي
يوم رهناته
وربطت حرام كساها
بخيط شدّاته
حثّت خطاها للكتاب جاباته
قالت علوم ضناي ما تضاهيها
بيدين ترعش فارحة مادّاته
يهنّي منام أمّيمتك هنّيها
يا خلال قصّة جميلة جابه بابا
وأهداه في ليلة زفة عزّ شبابه
حلّفها يمين غليظ تصون عتابه
هذه أمانة لبنتنا خبّيها
وشّح صدرها عروسة بين أحبابه
طبع الخدود بقبلة ما تنسيها
وقفت بداله اليوم بعد غيابه
قلتي بعيوني حياتكم نفديها
يا خلال فضّة نشهّدك بشهادة
ياما.. ليالي الوالدة نهّادة ؟
حلفتي عليّ نديد بين أنداده
وريتك عليّا رقيب في حضنها الدافئ
تحسب نجاحي تعدّه بالعدّادة
شقّق ساقيها البرد وما مشيت حافي
يكبر وليدي اليوم سيد أسياده
راحت أيام الذلّ جاها الشّافي
خلالك رحل والقلب وقدت ناره
ونزلت دموعك علي الخدود قطّارة
عام اللّي خلط اللّيل مع نهاره
مرّت عليه سنين وما نسيته
يا اللّي صمدتي شامخة صبّارة
في الضّيم غنّت رافعة الزغريطة
خلالك يعود يوم زاد عياره
حرامك كساك دروس يبقى خيطه
يا خلال جاش اليوم فيه نردّه
وإلاّ أهالي السّوء عليّا تصدّه
وليدي معرّض للخطر من مدّة
هو رفيق العمر عرفت أسراره
عايش معايا سنين فيها الشدّة
يحلم معايا نعيش نضمّ أصغاره
إذا حالوه عليّا السّور نهدّه
ونحلف برأسه نكمّل مشواره
الناصر الرديسي من مجموعة قمري